Desde as BMC festexamos o Día da Biblioteca compartindo conversa con Ana Belén Louzán García, vicepresidenta da ONG Viraventos e responsable de Acción Social no marco desta entidade enfocada en dar acollida e orientación aos colectivos inmigrantes chegados a Galicia.
Baixo o lema Bibliotecas e Comunidades, falamos con ela de proxectos actuais, de diferentes colaboracións da ONG e da importancia da participación coa comunidade máis próxima como elemento de integración e de futuro.
Ana Belén Louzán García (Lugo, 1977) pasou a súa infancia en Foz. Criada na mariña lucense trasladouse Á Coruña para titularse na que foi a primeira promoción de educadoras sociais da UDC, quedando definitivamente na cidade. Desde hai 25 anos reside no barrio da Agra do Orzán, onde hoxe tamén traballa.
Desde o remate da súa formación universitaria combinou labores de voluntariado con varias actividades relacionados co ámbito social, até que no 2005 tivo o primeiro emprego como Técnica de Inserción Sociolaboral na asociación Equus Zebra, unha ONG dedicada á integración socio-laboral de persoas en risco de exclusión.
A ese primeiro emprego no ámbito social, seguíronlle outros no Concello da Coruña e no programa de infancia Fundación Juan Soñador, mais as súas inquedanzas seguían postas no traballo co colectivo migrante.
No ano 2007 funda xunto a un grupo de persoas a ONG Viraventos, co obxectivo de continuar coa labor do voluntariado en apoio ao colectivo migrante, naquel momento procedente maioritariamente da África Subsahariana.
“O perfil das persoas beneficiarias dos proxectos foi cambiando nestes anos. Sobre o ano 2013 viviamos de cheo os bandazos da crise do 2008, con perda de empregos e numerosas saídas de Galicia. A maioría das persoas coas que traballabamos tiña permiso de residencia e traballo, xa con fillos/as escolarizados en Galicia.
A partires do ano 2019 o perfil comezou a mudar, aumentando considerablemente o número de persoas de recente chegada á cidade coa intención de solicitar protección internacional. Consecuencia dos atrancos da burocracia, o seu proceso de integración estase a dificultar enormemente, ao non poñerlles facilidades para o permiso de emprego até un ano despois da súa chegada”.
O BARRIO
“Como veciña que vive no barrio desde hai máis de 20 anos, vin as mudanzas do mesmo nos últimos tempos, e percibo que a partir do 2013 foise deteriorando cada vez máis por razóns diversas. Actualmente a comunidade migrante de diferentes nacionalidades tomou o relevo, aportando un ambiente multicultural no seo dunha alta densidade de poboación, especialmente na Agra do Orzán, ao que se suma unha deficitaria infraestrutura pública que non consegue dar abasto a unha poboación cada vez máis crecente”.
A rede municipal de bibliotecas, especialmente a Biblioteca Ágora, é un punto de encontro, un lugar onde desfrutar en familia.
“Falando desde a parte técnica e profesional, comprobo que moitas das atencións que facemos na ONG son de familias que habitan en infravivendas, nas que non hai garantía de temperatura axeitada nin ambiente de estudo para os nenos e nenas, polo que a rede de bibliotecas é un recurso extremadamente útil que permite o acceso a un ambiente agradable, conexión á rede, aos equipos informáticos e onde os pequenos poden facer as súas tarefas escolares. Para as persoas adultas en busca de emprego son un espazo onde acceder á formación online a través do acceso aos ordenadores, por exemplo”.
“Dentro dos recursos das bibliotecas á cidadanía destaco o Servizo de Atención Tecnolóxica, especialmente pola utilidade para o perfil de persoas coas que traballo”
“Nos últimos anos pasei de ter como preferencia de lectura a novela a facerme adicta aos libros sobre educación, especialmente a partir do nacemento dos meus fillos. Coido que lin toda a colección de Pais e Nais da Biblioteca Ágora. É por iso que para min dous referentes imprescindibles son Elizabeth Pantley, especialmente no libro “Educar niños hasta los diez años sin lágrimas” e Adele Faber con “Hermanos, no rivales”.
RECOMENDACIÓNS
UN FILME: A lista de Schindler de Steven Spielberg.
UN LIBRO: “Ensaio sobre a cegueira” de José Saramago.
UNHA CANCIÓN: Imagine de John Lennon.
UN LUGAR: París.
UNHA INQUEDANZA: A loita que lle espera á niña filla nunha sociedade cada vez máis machista.
UN DESEXO: Ter unha horta.
UN PECADO: A gula.
UNHA COMIDA: Tortilla de pataca (sen cebola).
Saramago facía fincapé na súa novela “Ensaio sobre a cegueira” da responsabilidade de ter ollos cando outras persoas xa non os tiñan. Coa recomendación da nosa convidada despedimos esta conversa polo Día da Biblioteca, poñendo foco na responsabilidade de reducir o nivel de vulnerabilidade social na comunidade da que formamos parte.
Grazas Ana por facernos partícipes do teu traballo e das túas ganas.
Foi un pracer!