SOMOS

A Biblioteca Ágora é a biblioteca máis grande e máis recente das Bibliotecas Municipais da Coruña.

Inserida no Centro Ágora, desenvolve o seu traballo a partir da súa condición de biblioteca pública e de proximidade, e vén dar servizo aos barrios do Ventorrillo, Agra do Orzán, San Pedro de Visma e Mariñeiros.

Para alén de desenvolver os programas comúns a toda a nosa rede municipal, a Biblioteca Ágora caracterízase polo seu traballo colaborativo cos colectivos, entidades e persoas dos barrios da súa influencia.

 Suma Ágora é a denominación que damos desde a Biblioteca Ágora a todo este traballo, e baixo ela desenvolvemos proxectos que procuran:

achegarnos  á  intrahistoria dos barrios e ao seu latexo cotiá, a través da memoria particular dos seus habitantes

reflectir o seu presente e favorecer a asunción da diversidade como un valor en positivo, que participa da identidade actual dos mesmos

dar voz aos veciños e veciñas, para recoller e proxectar cara o futuro os seus desexos, aspiracións e necesidades en relación ao seu barrio e á propia Biblioteca

Nas actividades relacionadas con Suma Ágora tentamos atender os elementos que conforman a vida cotiá nos nosos barrios:  as persoas, os espazos, as mudanzas urbanísticas e sociais, o mundo do traballo e do lecer, as festas, os colectivos, o deporte, a cultura…