Libros Viventes

En que consiste?

Libros Viventes é unha iniciativa da Biblioteca Ágora pensada para dar a coñecer ao alumnado dos centros de secundaria da nosa contorna as historias de vida de veciñas e veciños seus, a partir das cales reforzar o traballo en valores e o desenvolvemento persoal dos rapaces e rapazas dentro e fóra das aulas.

O procedemento de traballo é simple. Facemos unha selección previa de diferentes persoas da Coruña, recollemos as súas historias de vida e logo trasladámolas ao alumnado dos IES participantes.

Son eles quen escollen individualmente cal das historias queren coñecer, que libro vivente queren descubrir, para o cal nunha data determinada facilitamos o encontro entre as persoas protagonistas desa historia de vida e as mozas e mozos que os leron.

Deste modo, os libros viventes preséntanse como un método innovador para promover o diálogo, reducir os prexuízos, fomentar o entendemento entre as persoas e promover o intercambio de historias que, noutras circunstancias, non se podería ter compartido.

Obxectivos

Traballar a autoestima e a cohesión social desde a valorización do propio, do propio entorno diario e da súa xente.

Romper estereotipos, desafiando dalgunha maneira os prexuízos máis comúns dun xeito positivo e desenfadado.

Promover o respecto e a comprensión dunha forma concreta, sinxela e asequible.

Crear unha oportunidade para manter un diálogo entre persoas con visións e realidades diferentes da sociedade e así intercambiar opinións e aprender dos demais.

Cando?

Celébrase unha edición durante o curso escolar: entre xaneiro e febreiro. En cada edición trabállanse catro libros viventes diferentes.

Como participar?

Libros Viventes veuse desenvolvendo até o momento en colaboración co IES Agra do Orzán, mais é unha proposta aberta á súa realización con calquera centro de ensino da Coruña e mesmo doutros concellos.

Para valorar a posibilidade da súa realización con novos centros educativos simplemente hai que se poñer en contacto coa Biblioteca Ágora.

Máis información

Para saber máis do desenvolvemento deste programa pódese consultar o propio blog Suma Ágora e a través do correo bagora@coruna.gal.