A Biblioteca Ágora recupera os roteiros de saúde e deporte polo barrio
Por fin puidemos arrincar a espiña que nos deixou a interrupción obrigada pola covid-19 en marzo de 2020 cos roteiros de saúde e deporte, para acoller novamente a proposta neste abril de 2023. Desde a Biblioteca Ágora tiñamos moitas ganas de retomar unha actividade que levamos organizando desde o ano 2016 para coñecer o noso barrio, poñendo en valor os seus espazos e as súas xentes, especialmente aquelas vinculadas a diferentes disciplinas deportivas mentres traballamos valores relacionados co deporte e cunha vida máis saudable.
A proposta que compartimos co alumnado de 3º da ESO foi posible grazas á colaboración coa biblioteca escolar do IES Agra I, centro co que vimos traballando desde hai máis de dez anos nunha sintonía de apoio e cooperación.
Pero desta volta houbo mudanzas, por vez primeira, nas visitas previas que facemos ao instituto para explicar a actividade, propuxémoslle ao alumnado a posibilidade de descubrir ás persoas coas que compartirían os espazos deportivos con breves reseñas delas. Un total de 80 alumnos e alumnas do IES Agra do Orzán foron convidados para adentrarse en cinco historias persoais que se converteron no disparadeiro de saída para descubrir outros tantos lugares de saúde e deporte que pasamos a compartir.
1. Biblioteca Ágora e Medicina Chinesa
Con Vero López descubrimos na biblioteca unha das técnicas máis coñecidas da medicina chinesa, a acupuntura, e profundamos na Medicina Chinesa Integrativa como enfoque eficaz para descubrir como a mente produce patoloxías que afectan ao corpo. Tamén puxo en práctica co alumnado a reflexoloxía auricular, estimulando puntos reflexos que están interconectados con órganos e procesos corporais. Os medidores de puntos de acupuntura chamaron especialmente a atención entre o alumnado, sendo moitas as persoas sorprendidas coas desordes corporais que lles devolvía esta sinxela detección a modo de demostración.
2. Escola de Wing Chun e Artes Marciais Kiusao Kung Fu Galicia
Aprender a defenderse, loitar en todas as distancias do combate, técnicas de puños, patadas, cóbados, xeonllos, agarres, etc. Co Sifu Juan Saldeño o alumnado puido poñer en práctica algunhas das técnicas máis coñecidas do Wing Chun, unha arte marcial chinesa orientada á defensa persoal creada por unha sacerdotisa chamada Ng Mui. Como lembraba Juan, a base é empregar golpes de puño e golpes de man aberta sen usar bloqueos, senón que a “defensa é sempre un tipo de ataque“, neutralizando os golpes do opoñente para usalos na súa contra.
3. Club de Chave “Os mariñeiros”
Mais o alumnado tamén visitou con Manolo o Club de Chave de Mariñeiros, unha asociación que conta neste momento con 162 socios e socias e que está rexistrado dentro da Federación Galega de Deporte Autóctono na modalidade de chave. Neste momento ocupa o quinto posto da 1ª Categoría, tamén chamada especial, na que compiten un total de 12 Clubs da zona da Coruña e Carballo. En realidade a técnica deste xogo é sinxela: unha chave, uns pesos e unhas cantas liñas trazadas nun terreo liso e sen obstáculos que entorpezan a visión. A experiencia ensinóunos que se trata dunha disciplina que require dunha habilidade especial para, desde vinte ou trinta pasos, derrubar unha chave métálica forxada con material das vías do tren.
4. Asociación coruñesa de Jugger
E chegamos ao cuarto punto do roteiro, un dos máis desfrutados e mellor valorados polo alumnado de 3º da ESO, onde na explanada da Biblioteca Ágora esperaba a Asociación Coruñesa de Jugger Coruña. Hai tempo que o exterior da biblioteca se converteu no lugar escollido polos mozos e mozas da cidade para practicar un dos deportes máis orixinais e descoñecidos polo público xeral, o jugger, unión da esgrima, xogos de pelota e un toque de loita grecorromana. Alí Brandon, César, Raposo, Gonzalo ou Pingu explicaron as tres tipoloxías de xogadores, o corredor, que a súa función é anotar tantos, os xogadores armados con armas ríxidas, nos que se fai presente a base do esgrima, e o ketteman, que conta cunha pelota unida cunha cadea que pode lanzar aos rivais. Unha experiencia que o alumnado desfrutou intensamente.
5. Escola de Boxeo Azteca Box
E metidos na cuarta hora de roteiro o alumnado aterraba no quinto e último punto desta experiencia, a Escola de boxeo Azteca Box, onde esperaba Luís para compartir os espazos, materiais e fundamentos dunha disciplina deportiva con moitos defensores e detractores ao tempo. Lembrou o primeiro combate en diferido, un campionato de Europa que Alfredo Evangelista gañou por KO no octavo asalto ou o campionato do Mundo do peso medio entre dous grandes como Sugar Ray Leonard e Marvin Hagler, con vitoria para o primeiro a puntos, en palabra do adestrador, “quizais o combate máis fermoso que vin na miña vida” ao tempo que ensinaba como facer as vendaxes nos cotenos das mans ou as diferentes tipoloxías de guantes.
E non podiamos pechar esta nutrida experiencia sen saber que opinión lles mereceu aos mozos e mozas participar no Roteiro de Saúde e Deporte, posto que observar en que medida se están a cumprir cos propósitos de calidade é fundamento da nosa filosofía de traballo. Froito diso puidemos ver que o 91% do alumnado valorou como boa ou moi boa esta actividade para público xuvenil e, sen abafar con datos e resultados, isto danos folgos para seguir confiando nos roteiros de saúde e deporte como ferramenta para coñecer mellor a nosa contorna e poñer en valor os seus espazos e as súas xentes, especialmente aquelas vinculadas a diferentes disciplinas deportivas, e traballar valores relacionados co deporte e cunha vida máis saudable.
Agradecer novamente a todas as persoas que fixeron posible o desenvolvemento da actividade, tanto desde as Bibliotecas Municipais, como desde o IES e Biblioteca Escolar do Agra I e, por suposto, ás persoas individuais e colectivos cos que traballamos: Vero López desde Mamahuhu Ideas, Juan Saldeño desde Kiusao Kung Fu Galicia, Manuel Paz, Rebeca e Juan desde o Club de Chave de Mariñeiros, Asociación Jugger Coruña (César, Gonzalo, Pingu, Brandon, Raposo…), e Luís Súarez de Azteca Box.
Mil grazas e até a próxima!
Acerca de evavieites
Suma Ágora 