Este 11 de xaneiro, Día das persoas Usuarias de Bibliotecas, reivindicamos a posta en valor de todas as persoas que nos visitan decote nos nosos centros, dando voz a unha das nosas usuarias máis fieis, Mª Carmen Brage Rabina.
Hoxe, na nosa sección Conversas con… damos visibilidade a esta contribución imprescindible para medrarmos como bibliotecas.
Nacín en Mugardos hai 61 anos, meus avós rexentaban unha tenda moi coñecida neste pequeno pobo da comarca ferrolá. A finais dos anos 50 meus pais emigraron a Venezuela co proxecto futuro de regresar para montar o primeiro supermercado mugardés. Inda que non puido ser, a experiencia da emigración sendo eu nena deume algo moi importante, o primeiro contacto cos libros e cos contos. E digo isto porque en Caracas un tío de meu pai montara unha libraría e foi aí onde meu pai traballou durante varios anos, polo que era habitual que trouxera para a casa unha chea de libros cunhas edicións fermosísimas. Ao regreso a Galicia, as compañeiras de escola alucinaban cos estes libros de encadernación coidada, ilustracións incribles e con todo tipo de detalles que aquí non había, nos anos 60 Venezuela estaba culturalmente moito máis avanzada que España.
Logo chegaría a etapa compostelá como estudante nos primeiros anos 80 de Filoloxía Inglesa. Lembro que de adolescente desfrutaba moito da literatura e dos autores en lingua inglesa como Allan Poe e Agatha Christie, e a música nesta lingua tamén era a miña debilidade: os Beatles, Simon & Garfunkel, Bob Dylan ou Creedence.
No 1988 vin para a Coruña despois de casar, e no 1999 mudeime para San Pedro de Visma. Descubrín a Biblioteca Ágora cando xa levaba algún tempo aberta e considero moi importante que existan bibliotecas nos barrios para que todas as persoas teñamos as mesmas oportunidades.
PREFERENCIAS DE LECTURA DE CARME, CON NOME DE...
A FAMILIA BRAXE
Sempre tiven unha relación moi estreita con Lino, tanto por idade como por proximidade, levabámonos 11 meses e son a única curmá que vivía na Coruña. Era un tipo xenial, non se me ocorre outra palabra para describilo. Na familia deunos moita mágoa que non se lle tivera valorado máis en vida, o premio María Casares concedéuselle a título póstumo, cando en vida estivera nomeado en numerosas ocasións, tanto como actor como director. Lino falara persoalmente con María Casares para que autorizase que os premios levaran o seu nome, e logrou que viñera á primeira gala cando ela sempre se negara a volver á Coruña. Lino era unha persoa extremadamente sensible, e esa sensibilidade collía forma a través da poesía, el considerábase mais que nada un poeta. Boto moito en falta ao curmán, ao poeta e á persoa.
UN FILME: Gone with the Wind, de Victor Fleming.
UN LIBRO: Cien años de soledad, de Gabriel García Márquez.
UNHA CANCIÓN: Let It Be dos The Beatles.
UN LUGAR: Unha praia con acantilados.
UNHA INQUEDANZA: O exceso de violencia na sociedade, tamén a perda da educación e o respecto.
UN DESEXO: O remate da crise.
UN PECADO: A preguiza.
UNHA COMIDA: O polbo, son mugardesa.
Grazas por compartirte con nós Carmen, por ser este 11 de xaneiro voz e rostro dos centos de persoas usuarias que cada día visitan as nosas bibliotecas. Foi un pracer!