“Cada adolescente adecuadamente informada e orientada, é a mellor fonte de difusión”

O 14 de febreiro, coincidindo co Día dos Namorados celébrase o Día Europeo da Saúde Sexual. Celébrase desde 2003 a iniciativa da Alianza Europea para a Saúde Sexual (ESHA), organización non gobernamental que trata de concienciar e sensibilizar a homes e mulleres sobre a necesidade de adquirir e manter hábitos sexuais saudables. O certo é que a sexualidade forma parte do ser humano e contribúe ao benestar da persoa e, en definitiva, á súa felicidade. Por iso é tan importante fomentar a saúde sexual da poboación mediante o acceso á sanidade para todos os aspectos que poidan afectala, educar sobre a mesma na infancia e na mocidade, así como rematar cos tabús sobre sexualidade e moitos outros aspectos que inflúen na saúde sexual.

E para abordar cuestións como os dereitos sexuais, o sexo seguro ou a planificación familiar,  falamos na nosa sección Conversas con… Próspero Alberto Rojas Martínez , usuario da Biblioteca Ágora e médico cirurxián especialista en Xinecoloxía e Obstetricia pola Universidade Central de Venezuela.

Inquedanza pola saúde

Nacín en Caracas-Venezuela, o 2 de decembro de 1966, meu pai era contador público e miña nai traballadora social. Son o terceiro de cinco irmáns e desde neno tiven inclinación cara ás ciencias biolóxicas. A maiores,  a forte influencia do exemplo cotiá recibido por parte de meus pais, sempre dispostos a axudar ao máis necesitado, así como a admiración polo exercicio da profesión de miña nai, fixeron que fose perfilándome para estudar Medicina. Estudei na Escola de Medicina “Luis Razetti” da Universidade Central de Venezuela, obtendo o Título de Médico Cirurxián no ano 1994. En 1998 ingresei na Maternidade “Santa Ana” do Instituto Venezolano dos Seguros Sociais, onde cursei os meus 3 anos do Posgrao de Xinecoloxía e Obstetricia, obtendo o Título de Especialista en Xinecoloxía e Obstetricia no ano 2001.

Experiencia coa LOPNNA (Lei Orgánica para a Protección do Neno, Nena e Adolescente)

A LOPNNA entrou en vixencia en Venezuela o 1 de abril do ano 2000 co propósito de protexer os dereitos da infancia e a adolescencia en Venezuela, baseando os seus principios na Convención sobre os Dereitos do Neno. No seu artigo 48, entre outras cousas, establece que todo adolescente de 14 ou máis anos de idade, ten calidade xurídica para asistir a unha consulta médica de emerxencia, sen a autorización ou consentimento do seu representante legal; así como tamén o artigo 50, que establece o dereito que teñen á orientación e acceso á información, para o goce dunha saúde sexual e reprodutiva, o cal facilita a atención de poboacións de adolescentes provenientes de núcleos familiares de risco ou de extrema vulnerabilidade.

Na nosa experiencia no Servizo de Atención Integral á Adolescente da Maternidade Concepción Palacios, logrouse ensamblar un bo equipo de traballo, instruíndo a todo o persoal na maneira axeitada para o trato coas adolescentes. Traballando cun equipo integrado e comprometido lográronse excelentes resultados, reflectidos nas estatísticas médicas da área de influencia poboacional da nosa Maternidade.

Declaración dos Dereitos Sexuais

No que foi a miña experiencia en Venezuela, nun Servizo de Atención Diferenciada para Adolescentes, observei que se trata dun tema de desinformación grande, a todo nivel, que lastimosamente se repite unha e outra vez: condicións socio-económicas desfavorables, que promoven hábitos totalmente inadecuados e insanos; políticas de saúde que se plasman de boa maneira nun papel, pero que lamentablemente non se poñen en práctica de maneira realmente eficiente, polas razóns que sexan; o tabú de falar de maneira clara e explícita da sexualidade de maneira razoada e real, tanto no fogar, como nos distintos niveis educativos, tanto públicos como privados, onde non só reina a desinformación a nivel do estudantado, senón tamén a nivel de parte do profesorado. Na medida que se informe en xeral á poboación nos distintos niveis, será moito máis sinxelo poder lograr o obxectivo real, que é lograr unha verdadeira Saúde Sexual e Reprodutiva.

Por iso o vindeiro venres 16 de febreiro desenvolveremos na Biblioteca Ágora un encontro formativo dirixido ao alumnado de 3º e 4º da ESO do IES Agra I. Nesa xornada, Próspero acompañará aos mozos e mozas para dar resposta a moitas das dúbidas que teñan en relación á sexualidade. Ao tempo, e froito da necesidade de falar de maneira clara e explícita sobre esta cuestión, tamén está prevista unha sesión formativa dirixida ás familias de adolescentes da ANPA o vindeiro venres 15 de marzo, desta volta unicamente para público adulto.

QUE É PARA TI UNHA BIBLIOTECA?

Un sitio máxico e ideal para conectarte absolutamente con todo o referente á vida… é coñecemento, aprendizaxe, comunicación, difusión, socialización, globalización… para min é a vida mesma.

Un filme: “August Rush” / O Triunfo dun Soño (ano 2007). Dirixida por Kirsten Sheridan con Freddie Highmore, Keri Russell, Jonathan Rhys Meyers, Robin Williams.
Un Libro: “Ifigenia” de Teresa de la Parra.
Unha Canción: “Amo” / Axel.
Un Lugar: O meu fogar.
Unha Preocupación: O meu país / Venezuela.
Un Desexo: Vivir tranquilo, con calidade de vida, igualdade e liberdade.
 

Co desexo de alcanzar unha verdadeira saúde sexual e reprodutiva que contribúa ao benestar das persoas e á súa felicidade, despedimos a nosa conversa con Próspero este 14 de febreiro, Día Europeo da Saúde Sexual.

Grazas pola túa proximidade, pola entrega na colaboración coa biblioteca, por ofrecernos e compartir o teu coñecemento e experiencia, así como pola honestidade de facernos partícipes dunha situación persoal difícil que hoxe fai que o teu fogar tamén sexa Galicia.

Acerca de evavieites

Bibliotecaria. Creo na biblioteca como experiencia social positiva. Un espazo para todo o mundo e o que implica en calquera contexto: prosperidade para todas as persoas.

Ver todos os artigos de evavieites →