Pasou, e celebramos, o 8 de marzo
Maria Barbeito
Coma o ano pasado, na Biblioteca Ágora volvemos celebrar cunha pequena mostra de actualidade o 8 de Marzo, Día Internacional das Mulleres. Ensaio, poesía, narrativa, pensamento feminista, teoría queer, prensa, documentais, audiovisuais, … conforman a escolla de materiais elaborada polas compañeiras da Biblioteca Ágora, para os poñer a disposición de calquera persoa interesada.
Mais xa sabedes que Suma Ágora é un blog que ten como elemento central a atención á contorna do nosos bairros, e por iso nesta data sinalada queremos desde aquí facer un convite: o da descuberta e posta en valor das mulleres que, co seu talento, valentía e compromiso, fixeron progresar ao conxunto da sociedade da Coruña. Falamos de mulleres como María Barbeito, como Elvira Bao, como Amparo e Teresa Alvajar, como Amparo López Jean, como Sofía Casanova, … De moitas delas falan publicacións como as de Carlos Pereira , ou os medios en días determinados ou espazos específicos como o Álbum das Mulleres Galegas.
É vital para unha sociedade xusta e democrática recuperar e difundir os nomes, as vidas e as obras de tantas e tantas mulleres que foron protagonistas, en tempos ben complicados para elas, de traballos e exemplos valiosísimos para o avance social. Nós, cando menos, apostamos por iso e explicámolo ao noso xeito en textos coma este 8 de marzo, que acompañaban á Mostra que protagonizou estas semanas na nosa Biblioteca.
Acerca de xavier campos
Suma Ágora 