A mocidade convértese na protagonista dos roteiros de saúde e deporte da Biblioteca Ágora
Un ano máis é estupendo ver como se unen biblioteca, veciñanza e comunidade educativa para fomentar valores deportivos e un estilo de vida saudable. Os roteiros polo barrio son unha excelente maneira de gozar do bo tempo e fortalecer eses lazos comunitarios que establecemos hai máis dunha década coa Biblioteca Escolar do IES Agra do Orzán.
Organizamos os roteiros entre marzo e abril para coincidir coa celebración do Día Mundial da Saúde, que se conmemora o 7 deste mes grazas á iniciativa da OMS (Organización Mundial da Saúde). Este día ten como obxectivo promover o benestar físico, mental e social na vida das persoas e a nivel global. Este ano o lema é “Comezos saudables, futuros esperanzadores”, e centra esforzos para pór fin ás mortes de nais e bebés ao tempo que pon o foco en dar prioridade á saúde e o benestar das mulleres a longo prazo.
A actividade que implementamos con estudantes de 3º da ESO comeza con visitas ao instituto, onde lles explicamos en que consiste. Ofrecémoslles a oportunidade de coñecer ás persoas coas que compartirán os espazos de saúde e deporte, a través de breves relatos sobre as súas vidas. Un grupo de 77 estudiantes do IES Agra do Orzán tiveron a oportunidade de coñecer cinco historias persoais que se transformaron en catro paradas do noso roteiro de saúde e deporte.
1. Biblioteca Ágora e Hábitos de Vida Saudables
O primeiro punto do roteiro comezou na Biblioteca Ágora, guiado por María José Mosquera Santé, doutora en Bioloxía pola UDC e que posúe un Máster en Medicina Natural e Atención Primaria da facultade de Medicina da USC, ademais de ser profesora do mencionado posgrao. Durante a súa charla, expresou o seu desexo de axudar á mocidade a adoptar hábitos de vida saudables, centrándose na alimentación e a nutrición, pero tamén subliñando a importancia do descanso como un factor esencial para previr o dano celular.
2. Escola de Wing Chun e Artes Marciais Kiusao Kung Fu Galicia
Aprender a defenderse e a pelexar en todas as distancias do combate, aplicando técnicas de puños, patadas, cóbados, xeonllos, agarres, entre outras. Co Sifu Juan Saldeño, o alumnado tivo a oportunidade de practicar, no segundo punto do roteiro, algunhas das técnicas máis representativas do Wing Chun, unha arte marcial chinés desenvolvido pola sacerdotisa Ng Mui, orientado á defensa persoal. Como adoita lembrar Juan, a esencia desta disciplina radica en utilizar golpes de puño e de man aberta sen recorrer a bloqueos; en cambio, a defensa sempre se converte nun tipo de ataque, neutralizando os golpes do opoñente e aproveitándoos na súa contra.
3. Club de Chave “Os mariñeiros”
O alumnado tamén tivo a oportunidade de visitar, no terceiro punto do seu percorrido, o Club de Chave de Mariñeiros, unha asociación que actualmente conta con 162 persoas socias e está afiliada á Federación Galega de Deporte Autóctono na modalidade de chave. Neste momento, o club atópase no quinto posto da 1ª Categoría, coñecida como especial, onde compiten un total de 12 clubs das áreas da Coruña e Carballo. A técnica deste xogo é bastante sinxela: utilízanse unha chave, algúns pesos e liñas marcadas nun terreo liso e despexado que non obstaculice a visión. A experiencia amosóunos que esta disciplina demanda unha habilidade especial para derrubar unha chave metálica forxada con material das vías do tren desde unha distancia de entre vinte e trinta pasos.
4. Jugger Coruña
Chegamos ao cuarto punto do roteiro, que resultou ser un dos máis gozados e mellor valorados polo alumnado de 3º da ESO. No exterior da Biblioteca Ágora, recibiunos Black Cats, o equipo máis representativo de Jugger Coruña. Desde hai un tempo, o exterior da biblioteca converteuse no lugar preferido polos mozos da cidade para practicar un deporte bastante singular e pouco coñecido: o jugger, que mestura elementos de esgrima, xogos de pelota e un toque de loita grecorromana. Alí, Jason, David e Pingu presentáronnos as tres categorías de xogadores: o corredor, cuxa misión é anotar puntos; os xogadores armados con armas ríxidas, que participan mediante esgrima; e o ketteman, que utiliza unha pelota unida a unha cadea para lanzala aos seus opoñentes. Sen dúbida, foi unha experiencia que o alumnado gozou enormemente.
As avaliacións finais realizadas co alumnado de 3º da ESO foron o broche perfecto que confirmou o gran valor de integrar o traballo colaborativo entre a comunidade veciñal, as bibliotecas e a contorna escolar, todo iso acompañado de deportes e hábitos saudables. Este enfoque non só potencia a aprendizaxe, senón que tamén resalta a identidade e os recursos máis próximos do barrio.
Pechamos co agradecemento sincero a todas as persoas que fixemos posible esta experiencia, desde as Bibliotecas Municipais ata o IES e a Biblioteca Escolar do Agra do Orzán, especialmente a Iolanda. Tamén queremos recoñecer ás persoas e colectivos cos que colaboramos, como María José Mosquera Santé, Juan Saldeño de Kiusao Kung Fu Galicia, Manuel Paz do Club de Chave de Mariñeiros, e ao equipo de Black Cats, de Jugger Coruña (David, Pingu, Jason).
Agardamos vervos a próxima primavera, entre tanto, moita saúde para todas!
Acerca de evavieites
Suma Ágora 